Nagaland police chuan rangkachak tlang (gold bar) 290, kg 48.14-a rit leh ruihhlo, Rs. Vaibelchhe 29 zet an man a, mi pakua an man tel bawk tih Ningani khan an puang.
Nagaland Additional Director General of Police (Administration) Sandeep M Tamgadge chuang an thu dawn bawhzuia an chetnaah gold bar leh ruihhlote hi Inrinni, Pathianni leh Thawhtanni khan Khuzama, Kohima-a checkpoint-ah te an man tih a sawi.
An thil man hi tum khata an state-a an man tam ber a nih thu a sawi.
Tamgadge-a’n a sawi dan chuan Pathianni khan Kohima-Imphal National Highway-a tlan atangin rangkachak, a gear lever khuhna hnuaia an dah an man a. Packet 29 niin pakhatah gold bar 10 zel a ni a, kg 48.14 niin Rs. Vaibelchhe 22.78 man a ni.
Mi pahnih, Saurabh Singh (35) leh Pawan Kumar (45), Uttar Pradesh mi ve ve an man bawk.
Helai hmunah vek hian sahbawn bawm 88-a dah heroin kg 1.84 an leh opium kg khat, packet 12-a mi an hmu bawk a. An ruihhlo man hi Rs. Vaibelchhe 6.50 man a nih thu leh mi pasarih an man tel thu a sawi.
Assam Rifles leh Border Security Force (BSF) hotute chuan Myanmar atangin ruihhlo, a bikin methamphetamine, methamphetamine pawlh, caffeine leh a dangte chu bakah ralthuam tawlhruk a hluar hle niin an sawi a. Myanmar nen hian hmarchhak hi Mizoram, Arunachal Pradesh, Manipur leh Nagaland nen km 1,643 zet an intawm.
Nagaland pawh hi Myanmar atanga phal loh thil lak luhna kalkawng ber a ni.
“Ruihhlo leh ralthuam tawlhruk thin dang tur hian beihpui thlak reng a ni a, mi tam tak bakah an thil kente pawh Nagaland police hian a lo man tawh thin,” tiin police chuan an thuchhuahah an tar lang.
Hetih lai hian Assam police pawhin ruihhlo lakah hian beihpui thlakin thingtlang khuate pawh ruihhlo donaah hian an tang hle a ni.