Kan goal, policy leh leader kan zuar : ZPM vice president

ZPM Vice President Dr Kenneth Chawngliana’n, “ZPM hian thil pathum kan zuar a; chungte chu kan goal, kan policy leh kan leader te an ni,” a ti.

He thu hi nimina an pisa-a party chhung inkhawmah a sawi a. Dr Kenneth Chawngliana chuan, “ZPM goal chu kalphung thar hmanga mipui sorkar siam a ni,” tiin, kalphung thar ziarangah chuan party-ah thuneihna intawm hmanga kaihhruai te, mi pakhatin term hnih bak chief minister nih theih loh bakah CM-in works department khawih loh te, Val Upa Council uapna hnuaia party leh sorkar kalpui te, dan rorelna tun din te leh langtlang sorkar siamte a nih thu a sawi.

Dr Kenneth Chawngliana chuan eng dan berin nge an kal tih pawh hriatthiam har khawpa ram hmai bal hi tihfai an tum dawn a, a pui berah chuan mi rethei zawkten hma an sawn theihna turin hma an la dawi tih sawiin, “Tunlai hian Mizorama sorkar siam tum loa campaign an awm a, tute nge an nih kan hria a, heng mite hi ZPM zara sorkara tel tum an ni tih mipuiten hria se kan duh a, ZPM hian a malin mipui sorkar tha tak siam a tum a ni,” a ti.

ZPM vice president hian eng anga goal leh policy hi nei tha mah se, hruaitu tha an neih loh chuan an tum ram an thleng thei dawn lo niin a sawi a. “Mi bik, chawimawi hlawh, mahni tuma chiang, ei ru lo bera thlan chhuah, sorkar kalhmang hria leh assembly rorel thiam leader, Pu Lalduhoma kan nei hi kan vannei hle a ni,” tiin, ZPM hian an goal, an policy leh an leader-te hmangin Zoram thar an siam ngei a rin thu a sawi bawk.

Leave a Reply

error: Content is protected !!