Arsenal tan hun pawimawhah Gabriel Martinelli a che a, goal pawimawh khungin Manchester City lakah 1-0 in an chak.
Pathianni zana Emirates Stadium a inkhelah hian Premier League champion lai Manchester City in fimkhur takin football an khel a, mikhual team an nih angin tawngpawng nawr an tum lo.
Arsenal pawhin an duh angin goal an nawr thei lo fova, hei vang hian inkhel a nung lo thin.
Mahse huntawp dawn lam a hmuhnawm a, minute 86-naah Martinelli-a’n goal khungin inkhel a kaitho.
City chu first half-ah chance nei tha zawk niin midfiedler Declan Rice chuan Josko Gvardiol goal khung tur chu goal line atangin a petchhuak hman a. Nathan Ake pawhin goal a khung teuh.
Arsenal goal veng David Raya pawh Julian Alvarez lakah vawi hnih a chesual teuh.
Inkhel a sawihlawh ni bawk chu Mateo Kovacic a ni a, Manchester City midfielder hian Martin Odegaard leh Declan Rice a tackle chuan sawi a hlawh a, red card a hmu lo chuan titi a ti tam hle.
Gunners hian kum 2015 December hnua league inkhel a Manchester City laka hnehna an chan leh hmasak ber a ni.
Arsenal manager Mikel Arteta chuan, “A hautak dawn tih kan hria a, inkhel harsa ah hnehna chang turin chetthat hle a ngai tih kan hria. Hei vang hian ka player-te ka chhuang a, hnehna pawimawh tak kan chang a ni.” tiin a sawi.
Manchester City manager Pep Guardiola chuan, “Bul kan tan tha a, chance kan nei nual. Second half-ah an rawn tan tha ve viau thung a, ball an inpe kual tha hle. Kan inthlauhna a tam lova, an goal pawh dan per luh a ni a. A chak zawk an ni a, ka lawmpui e.” a ti ve bawk.
Inkhel dangah Liverpool in Brighton & Hove Albion lakah hnehna an chang thei lova, huntawp dawn lamah Brighton captain Lewis Dunk chuan an si phurh sutna goal khungin 2-2 in an inhnehtawk.
Amex Stadium a inkhel hmuhnawmah Brighton tan Simon Adingra chuan goal hmahruai a khung a. Hei hi Darwin Nunez siamsak atangin Mohamed Salah chuan a sut a, halftime hma in penalty atangin goal a khung nawn leh a ni.