Spain leh Barcelona midfielder Gavi chu Euro 2024 qualifying a Georgia nen an inkhelh tumin a inhliam a, a khup ti na in a chawlh rei a ngai dawn.
Kum 19 mi hian boruak a ball kang a lakna lamah a tum sual a, a khup hi ti na in Valladolid a inkhelah hian mittui nen khelmual a chhuahsan.
Manager Luis de la Fuente chuan a hliam hi uluk zawkin an endik dawn a, a khup a tha awm a ti na a nih hmel niin a sawi.
“Football a thil duhawm lo lai a ni. Hnehna chang chunga lawm a kim lohna lian tak a ni a, manager ka nih chhunga result tha nei chunga lawm a kim lohna lian ber a la ni ang.”
“Gavi tan hun harsa a ni a, Barcelona leh Spain tan bakah keima tan pawh a ni a, kan inkhelah khan kan tlawm ta ang maiin rilru a hreawm.” tiin a sawi.
Spain hi nakkum European Championship khel turin an tling tawh a, Group A a hmahruaitu ni turin 3-1 in an khingpuite hi an hneh.
La Roja hian an player pawimawhte chhawr thovin Robin le Normand hmangin hma an hruai a. Khvicha Kvaratskhelia chuan Georgia si phurh a sut a, mahse Ferran Torres leh Luka Lochoshvili own goal an neih belh.
Spanish Football Federation aiawh chuan Barcelona hnenah Gavi endikna hi an thawn tawh a, a club lam hian nizan khan Gavi hi an entha leh dawn niin an sawi bawk.