Aizawl: Mizoram Pradesh Congress Committee chuan nimin khan kum thara party intuaitharna leh infuih tharna hun an hmang a. He huna thusawitu, MPCC President Lalsawta’n MLA inthlanpui neih zawh taka an party chak lohna chu a mawhah a ngai.
Sibys Farm, Mualpuia hun an hmanah MPCC President Lalsawta chuan MLA inthlanpui neih zawh taka an party n an beisei ang hlawhtlinna an hmu zo lo chu, party president a nihna angin an chak lohna chu a mawh a nih thu a sawi.
A kumte a lo tam ve ta a, Mizoram tana hna tha thawk turin Pathianin hruaitu a pe leh dawn tih sawiin Lalsawta chuan, “Congress party hruaitu chuan Pathian lam hawia fing leh remhre taka party hruai a tul a ni. Kan duh leh kan tum ber chu nihna leh chanvo ni lovin kan ram, kan hnam, kan sakhua humhim leh kan party thatna ni zel rawh se,” a ti.
Mizoram enkawltu tur thlannaah sorkar tha siam turin rim takin kan thawk a; mahse, Mizoram mipuiin enchhin an duh a, an enchhin phawt loh chuan an dam dawn loh avangin ZPM chu enchhin turin an thlang tih sawiin, “Sorkar tha siam turin ram mipuiin an beisei a, keini pawhin kan beisei,” a ti bawk.
MPCC Sr Vice President Lal Thanzara pawhin thu sawiin Pathianin engkim tan hun a ruat a, roreltute pawh Pathian ruat an nih thu sawiin, “Ram enkawl turin Pathianin mipuite kaltlangin roreltu min pe a, party leh pawl hruai turin hruaitu min pe a, min ruatsak thin. Mahni chauh in ngaihtuah lovin, tunah leh nakin thlenga Congress party hnathawk leh theia kaihthawh chiah hi ka ngaihtuah tur a ni,” a ti.
MPCC General Secretary John Siamkunga kaihhruai inkhawmah hian MPCC Vice President Lalnunmawia Chuaungo leh MPCC Treasurer Dr Lalmalsawma Nghaka te pawhin thu an sawi bawk.