Kan hotute min hruai dan hi a tha tawk : Ronald Sapa

Nimina Congress party chhung inkhawmah Ronald Sapa Tlau, Vice President chuan thu sawiin, “Kan hotute min hruai dan hi a tha tawk a, kan pawm tlan a ngai a ni. Inlungrualna nen, taimakna nen kan kal chuan sawrkarna hi kan kutah a awm leh ang.

“ZPM sawrkar chuan Thlai pali lei an tum a, chung zingah chuan Hmunphiah lei a lo tul ta a. SEDP pawisa hman bang pawh a awm niin an sawi a, mahse an lei ta lo a. Hmunphiah chingtute beidawng takin an siam a, an rilru a na em em a ni.

“Chief Minister in Portfolio a nei lovang tih te, Ministerin motor pakhat chauh an kawl ang tih te chu a tak a chang ta lo a ni. Valupa Council pawh hian thu an nei tak tak lo niin miten an ngai a ni.

“Mipuiah beiseina sang tak an siam a, kalphung thar tiin mipui thinlung an hneh a. Mahse mipui beisei an pha ta lo ani. An kal chhoh zel danah hian term khat bak hi mipui hian an daih an ring ta lo a ni.

“Chuvangin keimahni ho hian mi tamtak tan kawngka kan lo hawn a, kan lo dawlzawh a ngai a, chutiang tur chuan kan inbuatsaih a ngai a ni. Central lamah te khuan ni tin kan boruak a eng tial tial a, BJP sawrkar khuan Haryana ah te chuan sarkarna siam phak tawh si lovin dik lo takin sawrkarna an la kalpui hram hram a, ‘kan chhe lutuk dawn e lo chelh hram hram rawh u’ an ti hial a ni.
Chuvangin India ramah hian kan boruak a kang zel a ni. Chuvangin theihtawp chhuah ila, inlungrual taka kan kal chuan sawrkarna hi kan chang leh dawn a ni.” a ti.

Leave a Reply

error: Content is protected !!