MNF in CAB a dodal a, UCC tha a ti lo bawk

Nimin a Hnam Run chhung inkhawm, political session hunah K.Riachho IAS (Rtd.) PAC, MNF General Headquarters chuan Bengal Eastern Frontier Regulation, 1873 chungchang sawiin, Zofate hian Pathian zawn chhuah ram kan inti fo thin a, he dan hi British in kum 1873-ah kan tana dan min lo siamsak daih tawh a ni a, kan ram leh hnam himna atan vawiin thlenga a pawimawh thu sawiin, he dan hi awm lo ta se tun dinhmun hi kan thleng lo ang, a ti.

He dan hi Assam District thenkhat, Chittagong hills tracts, Naga Hills-te tan pawh siam a ni a. Hnam tlem zawkte chimral lohna tura min siam a ni, a ti a.

Kum 1930, August ni 28- ah he order hi keini pawhin kan hman ve theihna tura siam a ni a. He dan hian tlawh chhan mumal tak neiin, Government of India Act, 1870 tlawhchhanin Lushai Hills a hmang ve turin a siam a. Keini pawh hian kum 1950, January ni 26 atang khan Indian constitution hi kan hmang ve tan chauh a ni, a ti bawk.

Kum 1986-ah state kan nih theihna turin UT laia dan kan hman chhunzawm theihna tur siam a ni a. India leh MNF inremna dan kha a hluin ILP kan nei chhunzawm a, MOU-ah Mizoram sorkar rawn hmasa lova ILP tihdanglam theih lohte kha a ropui takzet a ni, a ti. He dan hi India ramah a hman tlak loh titu tam tak an awm a, keini tan chuan a hluin kan inhumhimna a ni a, keini chuan khawi hmunah pawh in leh lo kan nei thiang a, hetiang dan hi neilo ta i la, kan sumdawnna lian zawng zawng hi kan ṭhenawm state te angin vai hovin min neihsak vek tawh ang a ti bawk.

CAB chungchang pawh sawiin Parliament-ah putluh anih khan India mipui pahnihin an duh loh laiin, pakhat chauhin an duh a. India mipui kan tam tawh teh reng nen, kan pun belh zelna tur a ni a, inthliar hranna nasa tak a ni. Keini pawhin NGO zawng zawng nen kan do a, Pu Zoramthanga sorkar khan Assembly-ah huaisen takin a dodal a, hemi dan hian min huam ta lo a ni, a ti a.

Uniform Civil Code chungchang pawh Mizoram tan a that loh thu K.Riachho chuan a sawi a. A sawi mawituten inthliarhranna a awm loh thu leh inpumkhatna a ni a, hmeichhia leh mipa intluk tlanna a awm theihna tur a ni an ti a. India rama sakhaw kulmuk tam takin an remti lo a. A duh lo pawlin sakhaw zalenna leh hnam tenau zawkte nen inpumkhatna a kalh an ti a. An sir tluk ta rih a, a duh chuan hman a, a duh lo chuan hman loh an ti a. Uttarakhand-ah chuan an pass tawh a, BJP hi a sorkar leh anih chuan an hmang vek lo ang tih a sawi theih loh a ni, a ti bawk.

He hun hi Ramzauva, Adviser, MNF Gen.Hqrs.chuan a kaihruai a, Lallenmawia Jongte Secretary, MNF General Headquarters chuan hunserh a hmang a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427