- Reuben Lalnunthara Hnamte
Nimahsela Thlarau Thianghlim chu in chunga alo thlen hunah thiltitheihna in la nei ang; tichuan Jerusalem khuaah te, Judai leh Samari ram khaw tinahte, kawlkil thleng pawhin ka thuhretute in ni ang. (Tirhkohte 1:8) a ti a. Lal Isua hian Thlarau Thianghlim hi a dah chungnung hle mai a. Amah aia pawha chungnung zawk ni hial awmin Isua hian a sawi a ni. Thlarau Thianghlim chu Paa chhuak a ni tih a sawi a, amah a kalbo dawn tawh avangin a aiawhin kan hnena min awmchilh na min kaihruaia, kawng min kawhmuhtu ni turin Pain a rawn tir dawn a ti a ni. Keini Trinity ringtute chuan Pa leh fapa leh Thlarau Thianghlim chu thil intluk tlang vek, thenhran theihloh, lan dan hrang mai a ni tih kan Thurin innghahna a ni a. Amah phatsantu Petera a thiante ho khan huaisenna leh thiltitheihnaa thuam an nih hma chuan chu Thlarau Thianghlim thiltihtheihna chu nghaka chang ngei turin a duh a . Isua chu an hria a, amah pawh an zui, a bulah an awm reng; mahse, huaisenna an nei lova, anmahniin thiltihtheihna an nei bawk hek lo. Isua an hrefiah tawk lova, Pathian a nihna leh fapa anga lokal a nihna lah an hre chiang bawk lo. Chung thil engkim hrefiah a, thiltihtheihna leh huaisenna a thuam an nihna tur chuan Thlarau Thianghlim an chan ngei a ngai a ni.
Tunlai ringtu intite zingah pawh hian Kohhrana inhmang, piangthar inti tho si, chakna leh thiltihtheihna nei si lo, mi te hmuh lova sual khawih hreh chuang lo; simna tak nei silo kan va tam em! Thlarau Thianghlim chang tur inpekna leh dawhtheihna kan neihlohna hian kan nunah Thlarau thiltihtheihna hmuh tur a awm thin si lo. Kohhran leh Biakin lama inla mitak viau, pawn lama han lem hlek emaw, hmeichhiat mipatna lam kalsan si lo, sum leh pai duhamna leh mahni hmasialna a khat si kan tam em em mai a ni. Huaisenna kan nei lova, thiltihtheihna lah kan nei hek lo, setana thlem hran pa pawh ngai lo, thlemthluk sa hi kan tam viau awm a sin. Thlarau Thianghlima thuam tur hian mahni inpekna, theihtawpa Lalpa auva, kan thinlung pindan chhungrilte atana pe tura khawvel laka kan in kharkhip tlat hi a tul a ni. Thlarau Thianghlim thiltitheihnaa thuam kan nih hma chuan he pindan chhungril Jerulalem hi chhuahsan lova, pawn lama dakchhuak miah lo turin Lalpan mi duh a ni. Kan dakchhuak hma lutuk thin a, kan nghak peih lova, kan pindan chhungril Jerusalem hi chhuahsan vat vat hi kan duh thin a, chu vang chuan Thlarau Thianghlim thuamna famkim kan chang thei thin lo.
Thlarau Thianghlim thiltihtheihna kan chan chuan hengte hi kan nei ang:
Huaisenna : Petera meuh pawh Isua phatsantu nimahsela Thlarauva thuam an nih meuh chuan a dawihzepna chu huaisennain a rawn thlak a, hlauh reng a nei tawh lo. Pharisai leh Juda mipuiho hmaah huaisen takin Isua chanchin a tlangaupui ta pawp pawp mai a ni. Man a hlau lova, tihhlum a hlau tawh hek lo; chu chu ni Thlarau Thianghlima thuamte awmdan chu. Keini zawngin mi mitmei veng reng reng, nalh loh hlau reng reng, mi sawisel hlau reng rengin rawng ka bawl kan ti a, thlarau bo pawh Isua hnenah kan hruai thei lovang. Pathian hian rawngbawltu, ringtu dawihzep tak hi a duh lo va, amah tan chuan huaisen taka engkim chan huam a a tana thawk tur hi a duh a ni.
Engkim an hrefiah thin : Zirtirte pawh kha Thlarauvin an thuam zet chuan engkim an hrefiah uarh uarh a, an thlarau mit tihvarin a awm a, Pathian thiltumte, Isua chung changte, engkim an hrefiah ta a. Thlarau Thianghlim chuan engkim min hrilhfiah a, rinna kawntgte leh a dangte mitvarnaa thuamin an awm thin. Anania leh saphirte nupa thiltih diklo pawh kha Petera khan engkim a lo hre vek a nih kha. Pathian Thlarauva thuamte chu finnna leh hriatna thiamin an awm thin. Lal Soloma pawh khan Pathian hnenah finna a dil a, Lalpan a thuam zet kha chuan a finna thu ngaithla turin khawvel ram hrang hrang atangin an local a ni.
Thiltihtheihnaa thuamin an awm : Ringtute, Lal Isua tana rawngbawltute tana pawimawh ber pakhat chu thiltihtheihna a thuama awm hi a ni. Lalpa rawngbawltute chu a tul hunah chuan damlo tihdam theihnate, ramhuai hnawhchhuah theihna te, thilmak tihtheihna te in a tul anga thuamin an awm thin. Ramhuai pawhin a hlauh loh ringtu, thiltihtheihna engmah nei lo rawngbawltu nih hi ava hlauhawm em! Khawvela thila mitvar hle ringawt ringtu, rawngbawltu nih hi a hlauhawm khawp mai. Mahni hamthatna tura a chuh helh helh, midang tuarna tur pawh pawisa lo rawngbawltu leh ringtu intih hi thil hlauhawm tak a ni.
Nang ringtu leh rawngbawltu; Lalpa Thlarau chuan thuam che a, chakna pek che a, huaisenna leh thiltihtheihnaa thuam che a duh a ni. Kohhrana inhmanga, inkhawma thawhlawm thawh ringawtah khan lungawi mai suh; Thlarau Thianghlimin a thuam theihna tur che in I thinlung chhungril Jerusalem kha chhuahsan lovin Pathian Thlarauvin a thuamna tur che in tawngtaiin tihtakzetin lo ngak rawh. Lalpa Thlarauvin a thuam che chuan I nun chu hmuh theihin alo danglam ang a, Lalpa tana pasaltha huaisen leh thiltihtheina a thiamin ilo awm tawh dawn a ni. I nun ringawt pawh kha mi dang tana malsawmna chhiartheih a lo ni tawh anga, nagmah kaltlangin midangin Lal Isua an lo hmu ang a, Pathian an fak tawh zawk dawn a ni. Amen!