Pathianni zing khan NBA Conference semi-final khelh chhunzawm a ni a, Dallas Maverikcs chuan an khingpui Oklahoma City Thunders an hneh a, final an lut. Mavericks hian champion lai Denver Nuggets leh Minnesota Timberwolves te inkhela chak zawk zawk an hmachhawn zui leh ang.
Series ah 3-2 a hmahruai mek Dallas Mavericks hian semi-final game ruknaah bul an tan tha lova, hun tawp dawn hnaih thlenga hnufual zawk an nih vangin tlawm zawkah an tang teuh hle nghe nghe. Dinhmun chhe zawkah ding bawk mah se hun tawp dawn tepah an khingpuite an lehthal a, hnehna pawimawh tak an chang.
Semi-final thawh rukna quarter hmasa berah Mavericks hi point 7 in an hnufual nghal a, bul an tan tha lo hle. Quarter hnihnaah pawh Thunders an khel tha chhunzawm a, point 9 in an chungnung zui leh a, point 16 zeta hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, Mavericks an khel tha ta hle. Quarter thumnaah point 9 a chungnungin an inkar an tizim a. Quarter hnuhnung berah point 8 in an chungnung zui leh a, point khatin an khingpuite an lehthal chiah chiah a. Point 117-116 a hnehna changin, final an lut ta a ni.
Thunders lehthalna final an luh theih nan Dallas Mavericks tan Luka Doncic a khel tha a, treble-double a puitlin. Doncic hian point 29 a thawkchhuak a, ball sawhlet vawi 10 a dawn bakah assist vawi 10 a nei tling bawk. Mavericks hian tun hi kum thum chhunga conference final an luh vawi hnihna a ni.