Inrinni final-ah world number one Iga Swiatek chuan Aryna Sabalenka laka a chungnun zawkna lantir chhunzawmin 6-2 6-3 hnehna zangkhai nen a vawithumna atan Italian Open trophy a chawi a, a career-a a title 21 lakna a ni nghal.
Tunthla tir lam Madrid Open final-ah pawh Pole Swiatek hian world number two Sabalenka a lo hneh tawh a, Rome khawpuia Foro Italico outdoor clay court final-ah pawh dingchang zawkah tang zui lehin, kum 2021 leh 2022-ah pawh he tournament-ah hian a lo champion tawh bawk a ni.
Kum 22-a upa Swiatek hi hmeichhe tennis player zinga kum khat chhunga Madrid leh Rome khaw clay-court tournament-a champion ve ve thei pathumna niin, kumli chhungin Italian Open title pathum ngawt a la t ling a, tuntum tournament bikah phei chuan set khat mah hloh loin a champion a, defending champion ni chunga a inlan zui lehna tur French Open-ah pawh rinkai ber a ni dawn khawp mai!
Tarlan tawh thin angin, he clay court grand slam hi tun May ni 26 atang hian Paris khuaah an khel tan dawn a ni.
- Mipa lamah Zverev thiam ber
Italian Open mipa singles final-ah Pathianni zan khan Alexander Zverev chuan 6-4, 7-5-in a tumkhatna atana finalist rawn ni ve nawlh Nicolas Jarry a hneh a, a career-a Masters title paruk a sualchhuahna a nih rualin Rome khaw tournament bika a vawihnih champion-na a ni a, kum 2017 hnu lama he title a lak vawikhatna leh kum 2022 French Open semi-final khelh laia a ke a tihtliah hnua trophy a dawn vawikhatna a ni bawk.
Kum 20 mi lek a nih laiin Rome-ah hian a lo champion t awh a, kum sarih hnuah a chhunzawm leh ta chiah a; Roland Garros atana a theihna sang ber a lantir chhoh leh tan dawn mek laiin nimina ATP ranking thar tarchhuahah pawh palina a luah chho leh pha ta hial a ni.
Beisei loh taka final thleng nawlh Chilean number 21 seed Jarry khan semi-final a luh thlengin a kalkawngah player hming hraw Stefanos Tsitsipas leh Tommy Paul a hneh a, first-serve point 95% zet hmu tling German Zverev em erawh a paltlang zo ta lo a ni.