England manager Gareth Southgate chuan Euro 2024-ah a squad tur a thlifim tan a. Ram aiawh tura a koh hmasak provisional squad-ah Manchester United forward Marcus Rashford chuan hmun a chang lo phawt.
England hian Germany-a khelh tur Euro 2024-ah player 26 an hruai dawn a. Player 26 hruai tur ni mah se thlitfim leh turin player 31 an ko phawt a. Player 31 zingah hian Rashford chuan hmun a chang lo. Season kal mekah Rashford hi a khel tha lo viau a, Manchester United tan vawi 33 khelin goal 7 chauh a thun a, assist vawi hnih chauh a nei bawk. United chetthat loh kum a ni a, chu chu Rashford pawh hian a tuar. England tan hian vawi 60 zet khelin, goal 17 thun tawh mah se Euro 2024 khel turin a tling zo ve ta lo thung.
Rashford-a’n hmun a chan loh lai hian England tana la khel lo Jarrad Branthwaite, Curtis Jones, Jarell Quansah leh Adam Wharton te chu a vawi khat nan koh an ni ve thung. Kum 21 mi Everton centre-back Branthwaite hian tawnhriat la ngah lo mah se Everton tan a khel tha thin viau a, EPL-ah an cham chhunzawm theih nana player thawhhlawk a ni. Manchester United in lak tumin an hel mek nghe nghe a, football khawvel-ah a hming a chher lian chak hle.
Report in a tarlan danin England senior player Jordan Henderson leh Chelsea winger Raheem Sterling te pawh Gareth Southgate hian a ko tel lo bawk. Hetihlai hian Manchester City-a hmun pawimawh chang phak tawh lo winger Jack Grealish chu koh tel a ni a. Brentford striker Ivan Toney, Manchester United midfielder Kobbie Mainoo leh left-back Luke Shaw pawh Southgate hian a ko tel bawk.
England aiawh tura kohte hian vawiin atangin training an zawm tan ang a, June ni 3 ah Bosnia-Herzegovina nen friendly match an khelh hnu June ni 7 ah Iceland nen an inhmachhawn zui ve leh ang. Euro 2024-ah England hi Group C-ah an awm a, Serbia, Denmark leh Slovenia te nen an awm tlang. June ni 16-ah Serbia hmachhawnin bul an tan ang.