Blackpink sum lakluh zat chiah hi mipui hriatah tarlan ni ngai lo mah se, kumkhata $Maktaduai 25.3 vel lalut ziah ang an ni. Chumi awmzia chu member pakhat hian kumtin $632,500 vel lalut anga chhut theih a ni. Anmahni enkawltu YG Entertainment nena an insemrual hnu-ah member pali te hian $Maktaduai 2.53 vel hi an la chang thei a, tambik leh tlembik awm lovin an inzahsem mai dawn a ni.
South Korean pop music idol (K-Pop stars) te hian dan khirh khiap tak an zawm a ngai a, an chunga dan an zam hi bawhchhiat a thiang lo. Buaina leh sawi neuh neuh laka fihlim thei ang bera awm tura beisei vek an ni a, top charts lama ro an rel lai phei chuan beiseina a sang zual.
Larna namenlo karah hian sum leh pai pawh an hailut tam hle a, Blackpink member te pawh hi han en ila, thil man chhiar zata buai lo leh an kawh apiang nei thei dinhmunah an ding. An member pakhat Jennie (Jennie Kim) hausakna kan en ang.
K-pop fan te’n Jennie an atchilh dan hi a namailo a, New Zealand-a seilian hian 2016 khan band zawm tanin, khawvel pum anga BlackPink lar tak taknaah Jennie hi kawng engkimah a kila lung pawimawh a ni deuh vek a, Lady Gaga nena an zaihona leh Coachella-a an inlan theihna te thlengin a huhang leh duhawmna hi sawi hmaih thiang a ni lo.
Celebrity Net Worth-in a chhut danin, Jennie hian a lo berah $Maktaduai 8 vel a thutpui mek a, a chhe berah band hi lo kehdarh ta ang pawh ni se, mimal (solor artist) ang pawha hlawhtling ber tur hiala sawi kai hat hat a ni. Blackpink member te hi music tihchhuah leh performance an neihna reng renga an hlawh te hi inzatin an insem vek niin Stylecaster-in a tarlang. Hlawh hi inzata an insem lai hian an label, YG Entertainment pawhin percent thahnem tak a la.
Band member pali te hian music mai piah lamah fakna chi hrang hrang atangin sum an la lut reng bawk a, Jennie hi an zingah pawh ngainat a hlawh zual. Kum 1996-a South Korea khawpui Seoul-a piang hi tunah hian Chanel ambassador a ni mek a, beauty brand Hera palai a ni bawk.