Aizawl: Central YMA hruaituten nimin khan Chief Minister Lalduhoma chu a pisaah an kawm a, thu pawimawh hrang hrang an sawipui.
Central YMA hruaituten YMA rorel inkhawm thurel, Mizoram Lokayukta hnuaia Investigation Wing siam chungchang an sawi pui a. The Mizoram Lokayukta Act, 2014 (amendment) a investigation tih lai paih tawh Act a dah let leh tura ngenna an thlen. Chief minister hian lo en zui a tum a lo hrilh.
March 15, 2025 a Union Home Minister Amit Shah lo zin tuma a tiam pahnih – Thingsulthliah a YMA rama Conference Centre sakna tur Rs. vbc 100 dilna kal zel leh Narcotics Control Bureau (NCB) kaltlanga ruihhlo dona tur sum dilna thehluh tawh te chu lo bawhzui a tum thu a sawi.
Central YMA hruaitute hian ruihhlo ngaite enkawlna atana Jordan Centre, Sethawn a mi chu cheibawl rawtna an thlen bawk a. Jordan Centre enkawl chungchangah sorkar leh kohhrante an indawr mek thu leh sorkarin ruihhlo ngaite enkawlna turah ngaihtuahna a sen mek thu a lo hrilh.
Kumin October thla a YMA inkhawmpui lian neihna tur Sakawrdai leh Mauchar inkar kawng pawh chak zawka siam that hna kalpui a nih tur thu Central YMA hruaitute hi a lo hrilh bawk.
Chief minister nena inkawmnaah hian Central YMA President Lalhmachhuana leh office bearer dangte an tel.