Aizawl: Thawhtanni khan Aizawl District Congress Committee (ADCC) buatsaihin Lengpui Community Hall-ah Mamit East Block Congress Political Training neih a ni a, he huna khuallian, MPCC Vice President Zodintluanga Ralte chuan ZPM sorkar chet dan hrang hrang leh ruahmannate pawmzam rual a nih loh thu a sawi.
ADCC hruaitute nena an hmanpuina a thusawiin Zodintluanga Ralte chuan ZPM chu Mizoram mipui chhiah khawn tawk tawk chungin rulh zawh sen rual loh leiba tam tak siam belhchhahtu a nih thu a sawi a, nausen pianghlim thlengin Rs 1,45,000 zet ba sa a khawvel eng an hmu ta mai chu a rapthlak hle a ni, a ti.
Zodintluanga Ralte chuan ZPM sorkarin sum an puk zozai te chu Restricted Tender leh Departmental Works hmanga mahni leh an worker-te inhaivur nana hmangin, motor thar manto pui pui te an inlei a, ram roreltute dawtsawi a hluar em avangin mipui pawhin dawt an ngainat phah tawh avangin ram dinhmun chu a dam lo mek tih a sawi.
ZPM chu eptu an nih laia an do em em Forest (Conservation) Amendment Act 2023 chu BJP sorkar tlawn nan Assembly House-ah consent rang taka pein, ramri atanga km 100 thleng an hralh nia puhin, Kohhrante Foreign Contribution (Regulations) Act hnuaia tanpuina dawnna kawngkhar kharsak a nih thlengin Meghalaya CM Conrad K. Sangma ang taka sakhaw thlavang hauhva do ngam lovah sorkar chu a puh bawk.
Ram leh hnam, sakhua leh mipuite him lohna dik lo taka kal mekte siamtha leh tu tur awmchhun chu Congress party chauh a ni tiin, hun kal tawha lungnih lohnate dah tha a, ram leh hnam tungding leh tur hian Congress party an ding chhuak leh dawn a, kuthnathawktu te leh thalai te hmasawnna tur ruahmanna fel tak an hotu leh mithiam rual ten an duang mek tih a sawi.