Thawhlehni leh Nilaini khan Hachhek tlangdunga Kuhva chingtute chuan Kuhva Kut hmangin, Mizoram chief minister leh home minister te chuan hun an hmanpui a, an kuthnathawh rah, an khuangchawi hun a nih avangin an hlut hle bawk.
Hachhek tlangdung hian hun engemawti atang khan eizawn nan Kuhva an ching tan a, Mizoram hmun danga eizawn nana lo hmang tawh chhungkaw tam tak awm mahse, anni lam hian tih tak takin chhungkaw tin deuh thawin an hmang chho a, a hlawkna pawh an tel nasa tawh hle.
Thawkkhat lai atang khan khawchhak lam atanga kuhva lo lutin harsatna tam tak a siamsak a, an kuhva hralhna market thlenga buaiin, hemi anih avang hian inzawmkhawmna pawl nghet tak an neih zui phah bawk.
Tuna Kuhva kut an hman leh chhan pawh hi an hlawhtlinna avanga favang hun awllen an hmanna a nih ber thu an hruaitute chuan an sawi a, kan ram hruaitu sang ber ber ten an hmanpui thei pawh hi a inhmeh hle a ni.
Hetianga kuthnathawktute hlawhtlinna leh sorkar sum siamchawp ngai lova hun hman ang hi awm tam thei se la, sorkar pawhin an mamawh chinah tanpuina pe chauh se, insenso leh sorkar sum kal ralna tam tak pawh hi a tlem phah ngeiin a rinawm.
Kuhva hmanga ram pum harsatna hi awm tawh lo se la, sorkar pawhin eizawn nana tih tak taka hmangtute hi duat leh dawmkan tum lehzual thei bawk se a tha hle.