Tun hnaia JERC (for Manipur & Mizoram) hnena Mizoram sorkarin kawlphetha chhit man tihsan rawtna a thlen chungchangah Mizoram Industry Owners’ Association (MIOA) chuan kawlphetha chhit man tihsan hi tha an tih loh thu resolution an siam.
Nimina an president, F Rodingliana ina MIOA hruaitute thukhawm chuan nikum maia kawlphetha chhit man tihsan a nih khan ni danga an la chawi ngai loh transmission loss, transformer pakhatah cheng sang tel an chawi belh tawh tih an sawi a. “Tuna power tarrift thar turah hian distribution loss 17.90% chawi belh tur a lo awm thar leh nen, kawlphetha chhit man a lo san chuan kan thil siam chhuah (production) man a to dawn avangin industry neitute bakah mipuiin an tuar dawn a ni,” tiin, kawlphetha chhit man tihpun leh tumna hi tha an tih loh thu resolution an siam.
Mizorama industry neitute chuan power supply mumal lo an tawrh thin thu sawiin, “Darkar khat lek chhunga vawi hnih vawi thum shutdown a awmte hian cheng sing tel an hloh zel a, state danga industrial estate-ah chuan power supply an shutdown dawnin hriattirna an pek hmasak thin laia Mizoramah chuan engmah inhriattir lawkna a awm ngai lo,” an ti a. Kawlphetha chhit man tihsan luih a nih pawhin a maintenance lamah tal tan la turin JERC an ngen nghal bawk.