Liverpool in UEFA Champions League quarter-final khel turin ke hlawh takin an pen a. Inter Milan lakah second half-ah goal hnih khungin 2-0 in hnehna an chang.
Round of 16 first leg hi Italy-ah Milan khawpui a khelh a ni a. Minute 75 chhung goal a luh loh hnuah an lo chet ropui fo tawhna \hin San Siro-ah Reds in goal an khung a. Brazil forward Roberto Firmino leh Egyptian ‘magician’ Mohamed Salah ten goal an khung.
Reds an chak
Inkhel hmuhnawm takah hian a mual neitu zawk hi ball chang hnem leh inkhel a langsar zawk an ni fova, goal luh hma in a che \ha zawk an ni.
Mahse Liverpool lamin hun\ha an neih an hmang \angkai thei zawk. Minute 75-naah corner an hmuh chu Andrew Robertson-a’n pet in Firmino-a’n a tauh lut.
Mohamed Salah chuan minute 83-naah an goal hnihna a khung a. Penalty area chhung a\ang goal-ah a ‘shoot a, hei hi dan pial niin an goal hnihna turin a lut. Liverpool hian Anfield-ah March 8 a second leg khelh a nih hunah dinhmun \ha tak a dingin inkhel an hmachhawn tawh ang.
Inter tana chance \ha ber chu Hakan Calhanoglu-a’n goal bar a pet per a ni a, Nerazzurri lam hian an inkhel thlirin goal khat tal khung an phu.
Reds hian goal zawna ‘shot’ an neih pahnih an khung avangin tling tura rinkai zawk an ni ta mek.
Reds midfielder Harvey Elliot chu UEFA Champions League chanchin a Liverpool tana bul \an thei naupang ber niin kum 18 leh ni 318 a upa hian club record a siam a. Inhliam avanga hun rei zawk a chawlh hnuah lo kir lehin a hna ngai a chhunzawm.
Reds tana chanchin lawmawm lo awm erawh tun season a an chhawr \angkai em em Portugal forward Diogo Jota, inhliam a ni a. Second half \an tirah Firmino-a’n a thlak a ngai.
Italy-ah Reds an hriam
Liverpool hi tunhnaiah inelna hrang hranga a zawna vawi sarih an chakna a ni a, Nilaini zana an result hi heng hnehna zinga \ha ber a ni ang.
Jurgen Klopp-a pawlte hi inkhel a chungnung zawk an ni lo chungin an \ang rei thei a. Bul an \an \ha zawk chungin Inter Milan an khel\ha a, chak turin an \an rei theih a ngai hle.
Jordan Henderson awm loh avanga captain Virgil van Dijk chuan Inter striker Edin Dzeko goal khung tur pawimawh takin a dansak a. A sir lama hnawk tak Ivan Perisic ball cross Lautaro Martinez khung theih loh a uiawm.
Liverpool hian quarter-final tling turin minute 90 dang theihtawp an chhuah leh la ngai dawn mahse Inter Milan tan kal zel turin an hmabak a ko tawh hle.
Tun season-ah Merseyside khaw club hian trophy pali chawi tumin beihpui an la thlak zel a. Return leg khelh a nih hunah pali zinga pakhat an la fel tawh thei a, February 27 hian Wembley-ah Chelsea nen Carabao Cup final an khel ang.
“Khel\ha lo mah ila chak kan phu”
Liverpool manager Jurgen Klopp chuan an inkhel thlirletin an khelh\hat ni ni lo mahse chak phu zawk ni tura an inkhelh thu a sawi.
“Tharum hmanga inelna a ni a, chak turin theihtawp a kawng kan dap a ngai.”
“Hetiang inkhelah hi chuan ball kawl rei a, ball thununtu zawk nih hi a pawimawh a, vawiinah hei hi kan ti thei lo. San Siro-ah hian beiseina nen ringawt a luh chi a ni lo.” tiin inkhel hautakzia a sawi a.
“Kan football khelh a \hat ber ni ni lo mahse chak zawk ni turin goal \ha tak vawi hnih kan khung a. Chak zawk ni tura thil kan tih miau avangin chak kan phu.”
“Diogo Jota inhliam tih loh chu han lawm lohna tur a awmin ka hre lo. Luis Diaz hian engkim a man nghal zung zung avangin ani kan chhawr thei tur hi kan \angkaipui dawn hle.” tiin a sawi bawk.