Tun hnaia Mizo hnam mualpho zawnga thu sawitu, Surita Chakma chu tun kar chhung ngeia ngaihdam dilna video siam tura Mizo Zirlai Pawl (MZP) General Headquarters chuan a hriattir.
Thawhlehni tlai khan MZP chuan Mizoram Chakma Students’ Union (MCSU) Zonal Hqrs, Aizawl hruaitute chu MZP Pisapui-ah an ko a, meeting an neihpui a. MZP President C. Lalremruata kaihhruai he meeting-ah hian tun hnaia MuroMuri Agency neitu Surita Chakma-i’n Mizo hnam mualpho zawnga thu a sawi chungchang leh, Rajiv Nagar bul a Missionary Rohmingthangi hriatrengna ‘In’ sak mek vawi tam tak suasam leh tihchhiat a nih chungchang te sawiho a ni.
MZP hruaitute chuan tualchhungah buaina siam fo leh hnam leh hnam inkar a thil thlengte, Tlabung chungchanga history dik lo vawrh chhuah fo te chu pawi an tih thu an sawi a. Mizo hnam mualpho zawnga thu sawitu Surita Chakma chu tun kar chhung ngeia ngaihdam dilna video siam tura hriattirin, MCSU hruaitute pawh he thil hi lo ngaihven tura chah an ni.
Missionary martar Rohmingthangi hriatrengna ‘In’ suasam a nih nawn leh chuan MZP-in a tul angin hma an lak tur thu an sawi a, hetiang thil a thlen nawn tawh loh nan MCSU hruaitute pawh zirlai pawl anga theihtawp lo chhuah tura hriattir an ni bawk.
He inkawmhonaah hian MZP OB leh Adviser-te bakah MCSU Zonal Hqrs Aizawl President leh member thahnem tak an tel a ni.