Lal chhungkua sawisel vang mai pawha kum 15 chhungzet Jail tan theihna a ni a, Thai Lal chhungkua te hi sorkarin Dan khirhkhiap leh khauh tak hmangin pawn lam atanga beihna lakah a hum tlat laia hi! chhiar rawh le.
An vawkpui lal len mah mah lo maw, tia hun rei tak atang tawha Thailand rama Lal chhung-kua te inrelbawl dan sawiselna kal zelah an rama metal band ‘Defying Decay’ chuan sawi hlawh leh sawi thiang lo a ngaih ni bawk chu hla thupui ah hmangin an auchhuahpui ta.
‘The Law 112: Secrecy and Renegades’ hla thar hian Thailand ramchhunga Dan khirh khiap leh khawng tak, ‘Lal chhungkaw sawisel thiang lo bur’ thupui hi nizan hmasa khan concert-ah lu su nghauh nghuah in fan tam takin an lo zawm dual dual a, guitar \e ring tak leh drum tlir dawt dawt hnuaiah thuneitute tan bengcheng an siam chiang hle, a tih theih.
Band single sawihlawh tak, ‘The Law 112: Secrecy and Renegades’ kaltlang hian Lal ber thuneihna leh thiltitheihna an cho a ni deuh ber a, Lal chhungkaw sawisel vang maia kum 15 thleng Jail tan theihna hi ei lo leh tul ti lo tam hle mah se, sorkar chuan khauh takin a kengkawh thung.
Heti anga inrelbawlna uchuak tak tidanglam a, siamthatna thawk tura chetchhuahna reng reng sorkar hian a en liam ngai lo.
Kum 2020 khan kawng zawh runpui te neiin, lung-awi lohna lantir hut hut ni mah se, Covid-19 thlipuiin a nangching nghal mai bawk nen, kalpui chhunzawm hleih theih a ni ta lo a ni.
Bangkok khawpuia nizan hmasaa concert ah Thailand chuan he hla live version hmasa ber a dawngsawng ta chu a ni a, US rock station lamah pawh mikhual vak tawh lo, ‘Defying Decay’ hian hmabak ko tak an nei dawn em, hriat ni lo mah se, an hla thu hi ngial ngan tak a ni lem lova, han huat em em na tur a awm lem lo, nia sawi a awm bawk.
Dan Sakei
The Law 112 thupui hi Thailand rama criminal code lar tak niin, he hla thu-ah hian tlang taka mimal leh institution sawisel chiamna a awm lo, tih a nih laiin, hla thupui hian ngaihven leh enzui bakah enthlak a hlawh ngei dawn tih erawh a chiang. Enliam mai a har ang.
Nikum hmasa November 2020 khan Lal chhungkaw sawiselna vanga thubuai siamsak leh hlin zui nghal hi mi 170 velzet an tling tawh niin, Thai Lawyers for Human Rights Organisation chuan a tarlang.
Political activist Pant Chiwarak (‘Penguin’ tia hriatlar) lakah thubuai hlabuai a tam ber a, The Law 122 hnuaiah thubuai 23 lawih a hma-chhawn mek. Nikum August atang khan hren a la ni reng.