Premier League club Liverpool in an tana khelmual thar ni lo tak San Siro-ah zaninah an inkhel dawn a. Inter Milan nen UEFA Champions League round of 16 an khel dawn.
European champion vawi ruk ni tawh Liverpool hian tun season-ah group stage-ah AC Milan vawikhat an tlawh tawh a, December thla a inkhelah 2-1 in Milan-ah hian hnehna an chang tawh.
Group stage a inkhel a chak vek Liverpool hi Champions League chanchin a group stage inkhel a English club chak vek hmasa ber an ni a. Kum 2019 a he trophy chawitu team hi kuminah pawh champion tura rinkai zing ami an ni.
An khingpui turte ve thung hi kum 10 chhunga a vawikhat nan Champions League knockout stage an khel dawn a. Knockout stage-ah Italy champion hi thleng thui tura rin zingah tel mahse minute 180 chhunga Liverpool paihthla turin an hmabak a ko.
Simone Inzaghi pawlte hi Group D-ah point 10 hmu in pahnihna an ni a. Sheriff Tiraspol leh Shakhtar Donetsk lakah point hmu thei mahse Real Madrid lakah point khat mah an hmu lova. Team lian lakah fiahna lian an tan a tling dawn.
Team news
Inter Milan tana inkhel thei lo langsar ber chu midfielder Nicolo Barella a ni a, Real Madrid nen group match hnuhnnung ber an khelh hnuah hrem a ni.
Joaquin Correa leh Robin Gosens te an la dam lova, Aleksandar Kolarov leh Stefano Sensi ziahluh an ni lo.
Hetihlai hian centre-back Alessandro Bastoni chu tualchhung inelna a hrem a nih avangin chawlh hahdamna hun nei hlim a ni a. Barella aiah Arturo Vidal chhawr theih a ni ang.
Liverpool in Turf Moor a kartawp a inkhel hautak paltlang team an siksawi dan tur hriat a ni lova. Inhliam langsar erawh nei lovin Diogo Jota chu Burnley lakah hliam tenau a neih avangin bul \an tir a ni lova, tun \umah erawh fit \ha hman tura ngaih a ni.
Salzburg vs Bayern
Tun kartawp a rin loh taka VfL Bochum laka an tlawm avangin Bayern Munich hma a ding tur Austrian club RB Salzburg in beiseina an nei anga, mahse zanin inkhel turah German champion lai hi rinkai zawk chiang takin an ni.
Salzburg hi Austrian club zinga Champions League knockout stage khel hmasa ber an ni dawn a. Group D-ah pahnihna an hauh.
Coach kum 33 mi Matthias Jassle hnuaiah dai ngai loh ram an dai a. An khingpui turte erawh season liamta ah vawi hnih an hmachhawn tawh a, an lakah tlawm ve ve in a belhkhawmin goal 9 an phur haw.
Bayern hi a zawna season 19-na atan knockout round khel tur an ni a, group stage-ah an ni pawh hnehna an chang vek.
Chutihrualin an goalkeeper rinrawl Manuel Neuer awm loh avangin an tlarhnung eng ang nge a nih dawn tih zawhna a awm a. Bochum pawhin an lakah goal li an khung theih avangin an fimkhur a ngai ve tho.
Leon Goretzka, Jamal Musiala leh Alphonso Davies te an la chhawr thei dawn lo bawk.
Lehlamah Salzburg in rawlthar forward Benjamin Sesko bakah Zlatko Junuzovic, Albert Vallci, Bryan Okoh, Bernardo, Sekou Koita leh Ousmane Diakite te an chhawr thei dawn lova. An tlarhmaah Bayern lak hual Karim Adeyemi leh Noah Okafor te an innghahna an ni leh ang.