Kamrul Laskar Uddin hnena Kamlova Chhangte hminga Tribal certificate pek cancel tura hmalakna kal zelah MSU chuan February ni 18, 2022 ral hma ngeia chinfel a nih theihna tura chak zawka hmalak an tum.
MSU chuan diklo taka Tribal certificate Kamlova Chhangte inti hnena pekchhuah chu November ni 23, 2021 khan cancel tura ngenna Aizawl bawrhsap hnenah an thehlut tawh tih sawiin, certificate neitu Kamrul Laskar Uddin pawh an biak thu leh innawr buai ngai lova amah ngeiin Tribal certificate a neih chu cancel dilna ziaka thehlut mai tura thurawn an pek thu an sawi a, vanduaithlak taka Aizawl bawrhsap pisapui a kan tak avangin he hmalakna hi a khaihlak ta niin an sawi.
Tun thla ni 5 khan Kamrul Laskar Uddin chu MSU Pisa Pui-ah lengin, MSU ruahmanna anga February ni 7-ah Bawrhsap Pisa-ah Tribal certificate cancel tura ngenna lehkha thehlut turin a intiam nia sawiin, February ni 7, 2022-ah chuan Kamrul Laskar Uddin chuan MSU hruaitute chu hna pawimawh a neih avanga lehkha a thehluh hman loh thu hrilhin, hemi hnu hian biak pawh theih loh leh chin hriatlohin a awm zui ta niin MSU chuan an sawi.
MSU chuan “Mizote Tribal nihna in a ken tel hamthatna min chuhpui duhtu hi Mizo hnam tana hnawk takah kan ngai” an ti a. “Tha taka kan dawrna zahlotu chet dan hi enliam mai har kan ti a, MSU hnena a intiam ang ngeia Tribal certificate hi February ni 18, 2022 hmaa a surrender lo a nih chuan Kamrul Laskar Uddin zawn hna hi kan thawk dawn a ni” an ti bawk.