HMEICHHE HUANG
Vun eng no thlen thei theirah te
- Robert Zoliana
Vun enkawl dan dang deuh, hmantlak bawk si i ngaihtuah chuan Thlairah hi a langsar pawlah tang rawh se. Thlairah ah hian nutrients leh vitamin tha tak tak a awm a, antioxidants hnâr tha tak a tling.
Theiraha hriselna awm te hian vun tih en nan te, hmai duk leh dum tihziaawm nan te, vun lang no lo te bakah vun tissue te thlengin harhtharna an thlen thei bawk.
Heng a hnuaia tarlan te hi Bazar ah awlsam taka hmuh leh lei mai theih a ni a, i vun a lo en phat phat a, no nung sar a nih theih nan hmang tangkai rawh le.
Serthlum
Vitamin C tamna a ni a, vun tan malsawmna hlang a ni. Oxidative damage leh photodamage ven nan a tangkai hle. DNA vang chhiatna te a tidam thei, inflammation a tiziaawm a, collagen simna kawngah a pui a, a hlanga ei emaw face pack ang pawhin tangkaina a nei.
Thingfanghma
Thingfanghma ah hian Vitamin A B leh C a awm tha hle a; antiviral, antibacterial leh antifungal hmanraw pawimawh a tling. Vun natna hrang hrang tan damna an thlen thei a. A hlanga ei emaw facepack ah te pawh hman theih vek a ni.
Fanghma
Vitamin C leh K a tam lawr lak a, fibre a tam vangin chaw pai a tinuam thei. Tui a pai tam a, chu chuan i taksa a vawng nung thei ang. Salad angin a siam theih a, tui (juice) pawh siam theih a ni bawk. Zai lep a, mit chunga dah vang vang te hian kan dam sawng sawng thei a, min tiharhvang thei bawk.
Gooseberry
Hei hi ‘Amla’ tia hriatlar a ni zawk mah a, vitamin C hlang tamna a ni. Antioxidant chak tak a pai a, tui a pai hnem hle bawk. Vun tan chauh a tha a ni mai lova, mit leh sam tan malsawmna duhawm a ni. Salad angin a siam theih.
Tomato
Mi tam tak chuan tomato hi vegetable angin an ngai a, ei leh in lama mithiam (nutritionist) te ngaihdan pawh a ni. Amaherawhchu, botanically chuan theirah chhungkaw zingami a ni. Vun kaw zau tur a veng a, lycopene antioxidant hian free radicals lakah beihpui a thlak hneh hle. Vun-a chulh hiau hiau a tha bawk.