Mizoram Legislative Assembly House Leader, Chief Minister Zoramthanga chuan tun sorkarin harsatna a tawrh chu amah pawhin a chhiatpui tham a tlakkhawm thu leh, hmasawnna hnathawh lam pawh ngaihtuah thei loa dam khaw chhuah dan ringawt an dap thu a sawi.
Budget session tan nia governor thusawi motion of thanks sawihona khaikhawmin house leader hian, “Kan sorkar hmasakin mautam tampui kan tuar a, kan mangang em em a; amaherawhchu, kan sutlang a. Tunah kan han sorkar leh a, kum khat kan kal a. Amaherawhchu, 2020 a lo thleng a, hripui a lo leng a. Kan Covid-19 avangin hun harsa tawpah kan hmuh angin, development kan sawi thei tawh lo, dam khaw chhuah kan tum ringawt mai ni,” a ti.
“African Swine Fever (ASF) a leng a, kan vawk sing thum bawr vel an han thi zawih zawih a. Khati khawpa ram ei bar min tibuaituin min su leh a. Kan la tawn ngai loh khawchhak area-ah lir a nghing a, a bialtu MLA tan, sorkar leh mipui tan a buaithlak a. Chubakah, Burma raltlan an rawn leh a ni,” tiin, sorkarin harsatna a tawrh hi amah pawhin a chhiatpui tham a tlak khawm thu a sawi.
Chief Minister hian Assam nen ramri-a buaina chungchangah mipuiin an hriatpui loh a mi mal anga a tawrh pawh nasa tak a nih thu a sawi a. Union home minister leh home secretary ten Vairengte thlanga Mizoram police-te inkulhna atanga inhnuk kir tura an tih chungchangah, inhnuk kir tura order a pe dawn a nih chuan a resignation pek hmasak a ngaih thuin a chhang tih sawiin, hemi hnuah hi chuan sorkar laipui hotute pawhin an nawr luih tawh loh thu Mizoram police-in an thutchilh hlen tak thu a sawi.
Kum khat leh thla 10-ah pawh sorkar laipui atanga hmuh tura budget-a a hlawm lian dah tawh, la hmuh loh Rs. vbc 2,700-2,800 vel a tling nia sawiin, hetah hian Mizoram atanga chhiah hmuh loh avanga harsatna a la tel loh thu a sawi a. “Rs. vbc 2,000-3,000 hmuh tur hmu si lo engtin nge kan kan dam khaw chhuah ni? Hun harsa atana Pathian min ruat a ni an tih pawh, min ruat lo tih theih a ni lo a,” Zoramthanga’n a ti.
Union Finance Minister in Bamboo Link Road tia bul tan nan Rs vbc. 100 a rawn a ruahman chu, “Hei hi a hmawr hawnna a ni a, a dang pawh a rawn kal zel ang an ti a. Pilot project anga kalpui turin, naute a rawn piang tak a, heta tang hian a kalpui zel dan tur pawh a rawn awm zel ang,” a ti bawk.
Sorkar flagship programme SEDP chungchang sawiin, “Theihtawpin tih tumin hma kan chhawp a. Hri leng vangin kan ti hleithei lo a. Mahse, tunah hri leng a ziaawm deuh a, budget present-ah SEDP pawisa kan dah tur zat pawh a lo awm ang,” tiin, SEDP hi Rs. sing nga tal in khatin an dawn theihna turin, chhungkaw 60,000 aia tlem loa bul tan nan tuam an tum thu a sawi.
“Pathian zarah kan chhunzawm ang a, hri leng pawh a lo ziaawm ang a. Chuvangin, hun harsa ringawt atana Pathianin tawng chhuak tur leh a hnua varparh arsi eng zual zel turin min siam ve anga kan ti a ni. Chuvangin, theihtawpin hma lak kan tum a ni,” tiin a thusawi hi a khar.
Motion pu luttu K. Laldawngliana’n Assembly House-a pass a dil hnuah larsap thusawi chunga lawmthu sawina motion hi lungrual taka pawm a ni.