Congress party chuan Assembly Session-a Larsap thusawiah, MNF sorkar flagship programme ber Socio-Economic Development Policy (SEDP) kaltlanga hmalakna tarlante chu duhkhawp awm lo hlea an hriat thu an sawi.
An thuchhuahah, Congress sorkar lai khan sorkar flagship programme NLUP leh NEDP te chu ngaih pawimawh ber pakhat a nih thin thu leh flagship programme hnuaia hmalakna tam tak sawi tur a awm thin laia, Governor thusawiah hian SEDP-ah cheng vaibelchhe 200 dah a nih thu tarlan a ni chu, SEDP hmanga hnathawh tarlante hi a tlem lulai deuh nia an ngaih thu an tar lang.
Congress party hian, “Inthlan hmaa an intiamna in tina cheng nuai thum sem a nih tur thu ziahlan a la ni miah lote hi a mak kan ti takzet a ni. CM Pu Zoramthanga’n a ngaihpawimawh em em Mau/Rua chin chungchang SEDP-a a tel miah lote hi a mak kan ti a, MNF sorkar kaldan hi awmze nei lo niah kan ngai a ni,” an ti.
SEDP cheng nuai thum dawng sawi tur an la awm miah loh laia SEDP sum hmanga Central Para Military Force BSF-te awmna tur siamsak an ni chu mak an tih thu te, Governor thusawia hmun a chan tlem dan ngaihtuahin MNF sorkar hian a flagship programme SEDP tihhlawhtlinna kawngah hmalak tumna tak tak a nei miah lo nia an ngaih thu an tar lang bawk.