Lemchan khawvel production company lian Warner Bros, Disney leh Sony te chuan Ukraine rûntu Russian rama film tlangzarh an tum te an titawp nghal vek, tih an puang.
Khawvel sorkar lian tak takte’n Moscow laka hrekna chi hrang hrang an vawrhchhuah sup sup hnu-a an thutlukan siam a ni a, tun zirtawpni-a Russia rama tihchhuah tur Warner Bros kutchhuak film hit tak, ‘The Batman’ chu Russian mipuite’n an en ve thei dawn ta lo.
Company thupuangtu chuan, “Ukraine rama harsatna nasa tak thleng mek en hian Russia rama ‘The Batman’ tihchhuah hi a remchang rih lovah kan ngai,” a ti.
Hetih lai hian, Disney pawhin Russia rama tih-chhuah tur Pixar animated film, ‘Turning Red’ chu a tikhawtlai ve bawk.
Disney thuchhuah siamah, “Ukraine laka tharum thawhna hmanga chetna hian harsatna tam tak a thlen chho mek a, chuvang chuan Russia rama film tihchhuah turte kan titawp vek rih a ni,’ a ti ve bawk.
Sony pawhin marvel adaptation, ‘Morbius’ chu Russia rama tihchhuah tum vek tawh hnu ah a tikhawmuang nghal ve bawk a, chhuah theih hun tur sawi theih pawh a ni tawh lo.