German champion Bayern Munich in Europe huap inelna lianah team hlauhawm an ni a, goal khung harsatna an nei lo tih lantir nawn lehin RB Salzburg lakah goal sarih an khung a. 7-1 in hnehna an chang.
German champion leh Austrian chhuanvawrte hi first leg-ah 1-1 in an inhnehtawk tawh a, 8-2 aggregate in Bayern Munich an tling.
Allianz Arena a inkhelah hian Bayern Munich tan striker Robert Lewadowski chuan a hna ngai a thawk a, minute 23 chhunga hattrick siamin Champions League chanchin a inkhel \an a\anga hattrick rang ber a siam.
A goal mawlh mawlh
Mahni mualah Bayern Munich in chak ngei an mamawh tih an hria a, inkhel \an a\angin an mamawh result nei tur angin an khel nghal.
Poland captain in UCL a inkhel vawi 100 bul a \annaah minute 12-na leh 21-naah penalty a\angin goal a khung a. Salzburg defender Maximilian Wober chuan fimkhur lo takin penalty vawi hnih a chawi.
Minute 23-naah goalkeeper Philipp Kohn-a’n ball petchhuah a tum chu nang fuhin a goal thumna a khung a. Tun season-ah goal 42 a khung tawh.
UCL a hattrick rang ber erawh a ni lova, kum 2011 a Lyon tana Bafetimbi Gomis-a’n minute 8 chhunga goal thum a khung chu a khum zo lo.
Kum 33 mi Lewandowski hi Cristiano Ronaldo (7) leh Lionel Messi (5) tih lova Champions League season khat a goal 10 chuang season thum aia tam khung thei awmchhun a ni.
First leg a an khelh \hat avangin Salzburg chu a tir lamah an phur a, chance \ha an nei nual. Nicolas Capaldo leh Nicolas Seiwald ten goal khungna remchang an neih an khung thei lo.
Lewandowski-a’n goal thum a khung hnuah Serge Gnabry chuan an goal li-na a khung a. Second half-ah Thomas Muller-a’n an goal nga na a khung.
Maurits Kjaergaard chuan mikhual tan goal khat khung ve mahse Muller leh Leroy Sane ten goal an khung nawn leh.
Bayern Munich goalkeeper Manuel Neuer chuan inkhel zawhah, “Zanin inkhel hi kan elpuite zawng zawng laka hriattirna lian tak a ni. Bul kan \an \hat zar kan zova, tunhnaia kan inkhel \henkhat ang lo takin tun \umah kan inlan. A tir a\ang kan rilru puthmang a dik a, he kan chet\hatna hi a kal chhoh zel kan beisei.” tiin a sawi.