United Kingdom chuan Russian mi hausa Roman Abramovich chu Russia in Ukraine a run mek karah Russia president Vladimir Putin thlawptu zinga a tel avangin a thil neihte a hrensak.
Abramovich hian tunhnaiah Parliament in a chunga hrekna kalpui theih dan a ngaihtuah avangin Chelsea hi hralh a tum thu a lo sawi tawh.
Tunah UK sorkar in Abramovich a hrekna a kalpuiah hian Chelsea an tel a, hei vang hian Chelsea hi hralh theih a ni rih dawn lova, club sum chetvel dan pawh nasa taka hren a ni.
He hrekna hi Chelsea chunga kenkawh tel a nihna chhan chu Abramovich-a ta a nih angin sum a hmuh belh lohna tura tih a ni.
Chiang zawkin
Sorkar hian Chelsea hi inkhel chhunzawm a, an hnuaia thawktu zawng zawngten hlawh an lak zel theihna turin ‘special license’ a pe a. Chelsea hian sorkar nen inbiakna an nei reng a, he license hi club inrelbawlna leh kalphung tibuai lo thei ang ber a kalpui theih dan an sawipui tih an sawi.
Season ticket neitute bakah inkhel a hmunah an en thei dawn lo, ticket hralh chhuah phal a ni tawh lo. He inhrenna kalpui a nih chhung hian Chelsea in player lei leh hralh a kalpui thei lova, contract thar pek pawh phal an ni lo.
Loan a club dang a Chelsea a\anga khelte chu an khelhmekna club-ah an khel chhunzawm zel thei ang a. Chelsea sumdawnna dawrte pawh khar vek a ni.
Chelsea ‘special license’ hnuaiah hian player, coaching staff leh thawktute zawng zawng hlawh pek phal an ni a. Away inkhel hmachhawn tura an zinchhuahnaah game khatah Pound 20,000 chin senso an nei thei a. Home inkhel an thlenna tura senso hi Pound 500,000 ah dah a ni thung.
He special license hnuaiah hian sorkar remtihna in Chelsea hi hralh theih a ni a, a hlawkna erawh Abramovich leh Russian Federation hnenah a kal thiang lo.