Lengpui Airport chei that mek “is falling down!”
Nimin piah tlai lam khan Lengpui Airport chei that mek chu a chim a, lei chim kan hriat fo hnuah building sak that chim zawngin hun kan tawng ang tih hlauhawm tak a ni. He building sak that mek chim chhan hi chu engpawh lo nise, mita hmutute chuan a sak dan a tha tawk lo hle niin an sawi a, uluk taka sak a nih loh avangin luah zui theih pawh nise, building hlauhawm tak a ni zui ang tih an hlauh thu an sawichhuak hlawm hial!
Kan rama hmasawnna hnathawh hrang hrangten rei an daih lo fo thin hi a mak a, hna tha viaua sawi pawh hian rei a daih loh fo bakah, chhiatna engemaw tal a thlen zel ta mai hi enfiah a, uluk leh nghet zawk, rin ngam tura hnathawh kan zir leh thar leh ngeite pawh a ngaiin a rinawm.
Lengpui Airport cheithat mek pawh hi uluk leh fimkhur zawkin sa tha se la, ramdang laka kan hmel lan chianna pakhat a nih reng dawn avangin tlo leh rei rin theih tur zawnga sak that a nih a pawimawh hle. Hlawkna aiin, a quality, a ngheh leh that reina lam kan ngaih pawimawh a hun tawh viau a ni.
Tuna mi ngat phei hi chu kan CM chan department hnuaia a sangawizawnpuite nena hnathawh a nih hmel a, tha leh tlo, engkimah a tha ber vekin an sa thei ngeiin a rinawm a, tuna a tlukchhiatna hnuchhawnin, hma thar la chungin, tha zawk leh tlo zawk, rinawm leh nghet zawka an rawn sak pum leh thuai beisei phawt teh ang.
Airport cute tih tawngkamte kan lo hre tawh a, CM ber inrawlhna nia sawi a nih bawk avangin sawi a hlawh reng dawn a, mipui ngaihven a ni reng dawn bawk. Chuvang chuan tha zawk leh tlo zawkin han thawk chho leh ngei bawk teh se.