Khelmual pawn lama thil thleng avangin Chelsea chanchin a ri hnem a, khelmual chhungah erawh engmah danglam lovin hnehna an chang chhunzawm. Table mawngphah a awm Norwich City lakah 3-1 in hnehna an chang.
Carrow Road a inkhel \an dawnah hian Chelsea \antu inkhel en tura kal ten Roman Abramovich hla an sa a. UK sorkar in Chelsea neitupa hi a hnuai a hausakna a neihte chu Ukraine runtu Russia president Vladimir Putin thlawptu a nih avangin an hrensak hnu lawkah Blues an inkhel.
Khelmual chhungah Blues in an club hmalam hun kal zel dan turah zawhna tam tak awm karah erawh an tih tur \ha takin an ti a. A tir minute 15 chhungin goal hnih an khung.
Minute 3-naah Trevoh Chalobah chuan Mason Mount-a corner pet a tauh lut a. Minute 14-naah Kai Havertz chuan Mount-a goal khung tur siamsak in England midfielder hian tun season-ah goal 8-na ni turin a khung.
Halftime zawhah Norwich in hma an sawn a, Teemu Pukki chuan Chalobah handball avanga penalty an hmuh chu goal-ah khungin Canaries in beiseina thar an nei a. Mahse German international Havertz-a’n inkhel dah\ha turin goal a khung.
Blues hi a zawna league hnehna an chan vawi li na a ni a. Pathumnaah an \huthmun sawh nghetin an khingpuite erawhin khelh 10 chiah la awma point nga in hmun him an la hlat mek.
Hna ngai Blues in thawk
Chelsea hmalam hun in sawi a hlawh a, dinhmun derthawng takah din phah nghal lo mahse an club hma hun awm zel dan tur sawilawk theih a ni lo.
Inkhel \an dawnah an captain Cesar Azpilicueta chuan ni dang ang a nih loh thu a lo sawi tawh a. Coach Thomas Tuchel pawhin club boruak-ah thuthang hrang hrang a tam thu a zep lo.
Inkhel \an a nih erawhin Blues in an hna ngai an thawk a, tunhnaia an tih \hin ang bawkin hneh takin he hna hi an thawk a, hmahruaitu zawk an ni nghal thuai.
An goal hnuhnung ber an khung hma in Andreas Christensen, Mateo Kovacic leh Mount ten an khung belh teuh hle vek.
Second half-ah Dean Smith-a pawlte an khel\ha chungin Blues dan theih an ni lova. Norwich City hi Championship a kir lehnghal thei tur dinhmunah an dintir chhunzawm.
Canaries hian anni ang bawka tlak hlauhawm a awm Burnley an la hmachhawn dawn a, nimahsela hun an nei tam tawh lo. Khelh 10 an la hmabak ah hian Europe inelna khelh phak ngei tum West Ham, Tottenham leh Manchester United te an la hmachhawn dawn.
“Kan kal zel ang”
Chelsea head coach Thomas Tuchel chuan hnehna an chan hnuah club hma hun chungchanga zawhna a chhang a. “Inkhel hmachhawn tura inthuamna tur kan neih a, inkhelhna hmun tur panna tur bus a awm chuan kan inpeih a, theihtawp chhuahin kan kal zel dawn.”
“Nitin kan hma a awm zel kan hmachhawn ang, nimin khan hetiang hi kan chungah a thleng dawn tih kan hre lova, naktukah eng nge thleng leh tur pawh ka hre lo.” a ti.
An boruak in team a nghawng dan sawifiah bawkin, “Heng thuthangte hi a awm lo thei lova, zawhna tam tak a awm mek a. Hengte hi rilruah a awm ve tlat avangin ngaihtuah loh theih a ni lo. Eng ang takin nge min nghawng dawn tih hi hriatthiam theih pawh a la ni lo.” tiin a chhang.
Hetihlai hian hmun \henkhatah Chelsea enkawltu sang zawkte ni lovin head coach Tuchel-a zelin club inrelbawl dan tur zawhna a chhang hi mak ti an awm ve mek bawk.
Inkhel dang
Newcastle United in season chawhma lamah tlak hlauhawm a an awm hnuah an dinhmun an siam\ha zel a. 2-1 in Southampton hnehin a zawnin Premier League-ah match 9 tlawm lovin an kal tawh.
St. Mary’s Stadium-ah Stuart Armstrong chuan goal khung hmasa mahse Newcastle lakluh thar pahnih Chris Wood leh Bruno Guimaraes ten an goal hmasa ber ve ve an khung.
A zawna vawi ruk nan Leeds United an tlawm leh a. Philippe Coutinho, Matty Cash leh Calum Chambers ten goal khungin 3-1 in Aston Villa lakah an tlawm