- Mahmuaka Chhakchhuak
Pu Lalbiakthanga, kum 63 mi chuan a chenna hmun Lawipui atangin kum hmasa lamah khan March 23 nia ke hlira kalin Tiau lui alo han kal thleng tawh a. Myanmar rama remna leh muanna a awm duhna vanga kal a ni. February 1, 2021 atanga sipaite’n mipui sorkarna an paih thlak atang khan duhlohna lantirna chu kal zelin nitin a lian telh telh a, kum khat liam hnu vawiinni thlengin ala tawp lo a. Mipuiin duh taka an thlan hruaitu Aung San Suu Kyi chu walkie-talkie kawl leh Natural Disaster Law bawhchhiaa puhin an hreng nghal bawk a. Sipai sorkar thar chuan hrohrang na tak hmangin mipui chungah thuneihna an lekkawh a, mipui lam hawia silai an hmetpuak satliah pawh a huatawm tawh nakalaiin nu nau pawisawi lo thlengin nunna chhahna atan silai an hmang lui ta fo maiin min engemawzatin an nunna hlu tak an chan tawhin mi engemawzat chuan nunna humhim duhin Mizoram an rawn pan thla mek zel bawk a.
PEACE RUN AWMZIA:
Aizawl atanga Tiau thlenga ke-a a kal tawh ang deuh hian Lawipu atang bawkin Pu Lalbiakthanga’n Peace Run a rawn kalpui leh ah hian chhan pawimawh tak a awm a, chungte chu;
- India hi tualdawi sorkar ni reng thinin Indo leh ralthuam hmanga inbeihna hi a duh ngai lo a, tunah Zalenna champha vawi 75 na kan hman mek bawk avangin hemi denchhen hian Mizoram khawpui pawimawh, District Headquarter tinte chu ke ngeia kalchhuah a tum a ni.
- Indiain Zalenna kum 75-na a hman mekah hian ram chhunga cheng mi zawng zawngte’n remna leh muanna kan lo neih theihna atan leh kan thinlunga remna leh muanna tak tak a awm theihna atan tlangaupui turin keimah ngei kal chhuah a ngai a ni tiin lirtheia chuang duh miah loin ke hlirin Zoram khawpui pawimawh zawng zawng kal thlen a tum a ni.
- Midang tana rawngbawlna pawimawh tak mai ‘Eye Donate’ hi mitin tih theih leh harsa lo tak a nih bawk avangin midang tana malsawmna kan nih vek theihna turin amah ngei pawhin a mit chu midang, a mamawh apiangte tan alo hlan tawh bawkin midangte pawhin hlan ve theuh tura a duh avangin a kalna apiangah chu thu chu a tlangaupui bawk a.
- Kan ramah Tuihna a tlem telh telhin kan khawpui thenkhatte tuihna tlan chu alo kangchat dawn dawn bawk thin a, hei hi keimahni zir loh leh thiltih vang a ni berin tuihna humhalh a pawimawh zia kan lo hriat deuh deuh theihna turin mission pawimawh takah a nei bawk.
A BUL TANNA LEH A KAL TAWHNATE:
Aizawl atang chuan lirthei hmanga chhukin Vairengte atangin Feb. 9, 2022 khan kein a rawn kal chho tan a, Bilkhawthlir thleng kalin zan a riak a. Feb. 10, 2022 ah chuan Bilkhawthlir atang hian Kolasib lamah kal zelin a tuk, Feb. 11, 2022-ah Bairabi lam a pan leh a. Tichuan Bairabi atangin Mamit lamah a kal leh a, Mamitah hian Pathianni a hmang a. A tuk thawhtanniah Dapchhuah lamah kal zelin Dapchhuahah hian zan a riak a, chuta tangin Tuahzawl lamah kal zelin, Tuahzawl atangin Reiek kaltlangin Feb. 16, 2022 ah Aizawl a lut a.
Aizawlah hian mamawh eng eng emaw lakhawmin Pathianni a hmang bawk a, tichuan Feb. 21, 2022 (Thawhtanni) ah chhim lam hawia chhuakin Aibawkah zan a riak a, a tukah Aibawk atangin Chhiahtlang a ban a, Feb. 23, 2022 niah chuan Chhiahtlang atangin Serchhip kal pelin Keitum a thleng leh a ni. Keitumah phei hi chuan tumah hmelhriat pawh a nei lo nain VCP In chu zawt chawpin a pan a, anni chuan tlangnel taka lo dawngsawngin zan a riak a, a tukah Pangzawl lamah kal zelin Keitum VCP hian Pangzawl khawtlang hruaitute hnenah hriattirna alo pe hmasa nghe nghe bawk a ni. Feb. 25, 2022 ah chuan Pangzawl atang chuan Hnahthial thleng hman turin a kal leh char char a, Hnahthialah zan riak lehin a tukah chuan zingah chhuakin tluang takin Dawn a thleng leh a. Dawnah hian Pathianni a hmang lehin Biakinah a inkhawm bawk a, nilengin hahdam takin a awm a, a tuk, Feb. 28, 2022 ah chuan Dawn atanga chhuak lehin tlai lam dar 5 velah Lunglei a thleng leh a.
Pathian zarah hetia a kalnaah hian a tluang thin hle a, amah hi kum 63 lai mi ni tawh mahsela ala hrisel thain taksa lamah na a nei rih lo a, kawng a kalnaah pawh hian harsatna lian tham ala tawk lem lo a ni. Hetianga kea a kalnaah hian khawngaihtu tawngin mi thenkhatte chuan an motor-a chuang turtein an lo ko a, nimahsela motor-a chuan a rem loh thu sawiin ke hlira kal a ngaih thu a han sawi chuan tha takin an kalsan leh mai thin bawk a, Zobawk khawchhung a kal lai phei chuan Nu hoin an lo au a, fiamthuin an in chhang tawn vel bawk a ni awm e.
A KAL ZELNA TURTE:
Lunglei atang hian March 1, 2022 (Thawhlehni) zingah khan chhuakin Chhumkhum lam panin a kal leh ang a, khawi lai hmun nge a thlen dawn tih erawh hre mai bik loin a thlen tawp tawpa zan riak mai turin a chhuak tawp mai a ni. Chawngte lamah kal zelin Diltlang, Lawngtlai, Siaha, chuta tangin Sangau lama kal zelin Bualpui, Cherhlun, Sailulak lamah kal zel a tum a, Sailulak hi a pianna khua a nih avangin zanriah ngei a tum bawk. Chuta tang chuan khawchhak tuipui kanin Zawlsei, Bungzung, Khawbung, Vanzau lamahte kal zelin Kelkang leh Khuangleng, Champhai atangin Khawzawlah a let thla leh ang a, Saitualah chhuk zelin chuta tangin Suangpuilawn lamah a inher thung ang a, hmar tlangdung zawhin Darlawn leh Ratu kal pel zelin Sakawrdaiah he PEACE RUN hi hun tawp hman a tum a ni.
TLANGKAWMNA:
Hetianga kum 63 mi Pu Lalbiakthanga’n zoram pum, chhim leh hmar, chhak leh thlang tawp thleng ke hlira fanchhuah a tumna hi a lehlam kawng takah chuan thil atthlak tak pawh a ni thei ang a, nimahsela a kalchhan hi a chiangin midang tihhmuhtu ni tura a inhlanna hi a ropui thlawt a ni. Midang angin thusawi thiam a ni lo a, ziak mi pawh a nih bawk siloh avangin mi hnena hetia tlangau hi a tih theih ber niin a inhria a, thahnemngai takin a kal ta tlauh tlauh mai a, a chhuanawmin a fakawm hle mai a, a mission ngei pawh hlawhtlinna a hmuh ngei a beisei awm a ni.