Mizo mipuite min tihlim a, min tinui thintu fiamthu kulhpui Lalnunsanga chuan nimin khan min tingui a, min tinguai a, tahna min thlen. Nimin chhun dar 12:35 khan Civil Hospital, Aizawl ah a boral. A accident-na lamah a lû a sawh na angreng a, hemi kaihhnawih zelah a dinhmun tha lo tial tialin, a lei zinkawng a zawh tawp ta a ni.
Comedian Search 2012 champion a nih hlim hlawl khan Thalai Times, November 5, 2012 Thawhtanni chhuakah Lalnunsanga (LNS) biangbiakna (exclusive interview) tih-chhuah a ni a, tunah amah hriatreng nan leh fan te tan chhawpchhuahleh a ni:
TT: Pakhatna nih i inbeisei réng em?
LNS: Zep lovah chuan, a tir phat atang khan ka beisei. Pathian hnenah, ‘Pakhatna’ nih ka dil tawp a, pahnihna leh pathumna kha a lang lova, pakhatna nih kha ka tawngtaina a ni.
TT: Tlâk hlauhawm dinhmunah te i ding em?
LNS: Final first leg thlen hmâ, chhun lamah khan nileng tak meuha hnathawhna lama ka buai avangin hman hmawh bak-leng leh hah tak bawk siin intihsiakna ka lut nghal kha a ni a, tlak theihna zan kha a ni lo hrim hrim a, a bak kha chu tlak hlauhawm dinhmunah chuan ka in dah lem lo.
TT: Engtinnge fiamthu te hi i remkhawm thin?
LNS: A tir atang khan sawi awm tur leh sawi dan tur te kha ka zir lawk nasat avangin ka hrechiang em em a, ka bel em em mai a ni.
TT: Pakhatna ni ta lo la, tunge pakhatna nih i rin?
LNS: Lalduhawma, Aizawl Dinthar kha ka ring. A fiamthu ka en khan a fuh vel vek a, frank deuha sawi chuan mi tawng tam lem lo, puitling riau bawk si, ruihtheihthilah pawh fihlim a ni a, ani kha ka beisei a, pakhatna pawh ni se, a awm ka ti.
TT: Pakhatna ni tlâkah i inngai reng em? Engvanga pakhatna hi ni thei nge nia i in hriat?
LNS: Mihring mihrinna ah chuan mi hmâa ding ngai meuh lo nih bawk si chuan pakhatna ni tlâka inngaih lohna leh inrin loh châng te pawh a awm thin. Amaherawhchu, Pathianin, ‘Pakhatna’ min nih tirah ka ngai. SMS vote angah phei kha chuan a hniam ber dawttu leh hmu chhe berte zingami ka ni.
TT: Comedian Search-ah hian tel tumna i nei hrim hrim em? Chhungte leh thian-tha te fuih vang zawka tel?
LNS: Tel tumna leh duhna ka nei sa hrim hrim a, form lakchhuah hmâ khan ka ke ka ti na palh a, ka thianpa Zonunmawia’n form min lo laksak a, ka inziaklut ve ta rawih mai a ni.
Eng nge a sawi?
Zofate fiamthu khawvela arsi êng berte zinga mi, stand-up comedy-ah chuan a mimal tak pawha ka dah sân êm êm Lalnunsanga chu a kal ve leh ta!
Sanga kha comedian search ngainatute chuan kan ngaina vekin ka ring a, ‘Sense of Humour’ nei ve ngang lo tih loh chuan a fiamthu kha kan hlimpui vek ngei ang.
Tun hnaiah min rawn call fo mai. Kan hnaa kan pu hi Malsawmtluanga a ni a, kan awm dun lai takin Sanga hian min rawn call. Chutih lai tak chuan Sanga chu comedian Malsawmtluanga nena an awm dun lai a ni ve mek bawk.
Min rawn call lai chuan loudspeaker-ah ka dah a, ka record bawk a, pawi sawi tum ranin thil ka zâwt ta vêl alawm.
Sanga mizia chu ka hre bel ve thawkhat bawk a, “Malsawmtluanga kha i ngaisang em?” ka ti. Chu veleh amah Sanga zia dik takin “Ngaisang teh nang aw. Malsawmtluanga tih rêng rêng lâk tlâk an awm lo,” a ti nghal.
Ka beisei ang chiah chhânna. Ka bula awm mek, kan Pu Malsawmtluanga nen kan nui vak vak.
Ka ngai dâwn êm êm mai. Mizo zawng zawng deuhthawin kan ngaiin ka ring.
Roluaha nen khitah in han khawsa dûn dawn chu a nia leh… A va nuam dawn dur dur tak. Van khawpui chu an nui leh hluah hluah mai dawn chu a ni sia leh…
Goodbye… Legend
- Stephen Auhmun
Judge, Comedian Search