- Robert Zoliana
Chhiar tir rawh le!
Sex hman châk lohna:
Pum a lo len tawh chuan mipa tan a buai theih hle a, mahse hetah hi chuan hmei-chhia a zirin a danglam thei.
Hmeichhe thenkhatte chu an serh bawr velah thisen luang-lut leh inhnawh a tam tak avangin an phur viau lawi a. Chutih laiin thenkhat erawh chuan naute-ah harsatna a thlen hlauvin sex hman loh hram hram an tum bawk thin.
In dinhmun a him tawk lova, hmeichhe lam thiam doctor-in insum tura thurawn a pek lem loh che u chuan pa-ngngai taka nupa hlimna hman hi a sual hran lo.
Naupai atanga thla thum chhung hi chu a him tawka ngaih a ni a, position hman dan thiam a tha a, a sir zâwng-in emaw a chunga hmeichhe awmtir te hi Nu, naupai tan himna a ni.
Nu ber a phur hlei thei lo a nih pawhin mipa tan mangan vak tur a ni lem lova, a chau thei a, luakchhuak benvawn a neih thin avangin a châk lo te pawh a ni thei a, kawng dan zawnte pawh a tul châng a awm ang.
Hun a lo inher liam a…
Naupai lai leh hrin hnu-ah in inlaichinna boruak a danglam ang tih hlauhna i nei mai thei a, mahse hei hi a lo awm a nih pawhin a thim zâwnga lak loh tur a ni ang.
Dik tak chuan, naupai lai hian inlaichinna leh inzawmna hi a nghet zual bik thin a, mipate hian an nupuite tihhlim hram hram dan an ngaihtuah tlangpui.
Zin bo san te, hnathawhna hmuna rei tak tak hun hman te hi a theih hram chuan pumpelh a tha a, nupuite bula awm tam a, induh zawng leh hlauhthawn ang chite infah tawn fo hi a hrisel a ni.
Naute a lo chhuah hnu hian a hre chang tawh lo ang che tih hlauhna i nei thei a, mahse hei hi a dik lo. Naute pa i nih chhung chuan hlim takin naute chungchangah eng-kim inti dun thei zawk ang.
Naute in han neih tâkah chuan ‘Nu leh pa entawn tlak’ in ni thei ang em? tih zawhna lian tak mai a rawn lang nghal dawn a. Hetah tak mai hian naute enkawl dan tur leh chawm dan tur thlengin rua-hmanna mumal tak lo neih lawk tur a ni a, naute hmel hmuh hnu-ah insiam rem tum chuk chuk hi a fuh lo duh hle tih hriat a tha.
Inpawh taka hun hman:
Thil tih tur reng rengah a mala tih a tha chiah lova, in pahniha in tih leh thawh dun theih tur ang chi zawn a, inpawh taka hun hman dun tur. Zing-a ke-a kal dun te leh hnaih taka han thut dun te hi inchhir awm loh tak a ni.
Chhungkaw member thar an lo awm takah chuan sum leh pai hman dan turte pawh sawi dun tur a ni a, harsatna lo thleng thei te leh chumi atana lo inpuahchahna tur te hi mimal anga hma-chhawn chi a ni lova, nupa anga tan hova, thawh dun chi a ni
A tawp ber atan chuan naute pa i nih theihna tura naute paitu leh hringtu i Nupui kha thleng keh thei dawma dawm hi i mawhphurhna a ni a, a hmangaih let-na i mamawh miau a, nang pawhin chhan let dan tur i tlachham bik tur a ni hauh lovang. Hei hi a pawimawh hle a, i hrereng dawn nia.