Auto Corner
by Ruata
Maruti Suzuki leh Toyota Kirloskar Motor chuan mid-size SUV huanga rawn luh tumin tunah hian he huanga an lirthei tur an buaipui mek a. Kumin chhung hian an tlangzarh hman a rinawm a ni.
Midsize SUV huangah hian Hyundai Creta, Kia Seltos, Renault Duster leh adangte kan lo hmu tawh a. Maruti Suzuki hian compact SUV huangah chuan Brezza an tichhuak mek a, Toyota pawhin company pahnih thawhdunna atang thoin Brezza rebadged, Urban Cruiser an tichhuak mek bawk a ni. Heng ho aia lian hret Hyundai Creta leh a dang kan tarlan tak te el tur hi Maruti Suzuki leh Toyota atang hian a awm lo a. Tunah hian Creta hi market lamah pawh hmahruaitu a ni a, hralh a kal chur chur hle a ni. Maruti Suzuki leh Toyota in an rawn duan ve tur mid-size SUV thar te hi eng nge an an dawn hriat a chakawm tawh hle a, an nghahhlelhawm viau bawk.
Maruti leh Toyota hian an SUV tihchhuah tum hi a hrang ve vein, thil hrang hrang intawm siin an tichhuak dawn niin a lang a. Maruti Suzuki ho ta tur hi a codename-ah Maruti YFG tih vuah a ni a, Toyota ta tur hi a codename-ah Toyota D22 tih vuah a ni bawk a. Heng SUV te hi an enchhin lai thlalak hmuhtur a awm nual tawh a, heng thlalakah te hian an thup nan a lirthei ruangam lang tam thei loin khuh bo vek a ni thung a. Kan hriat theih chin ang tun tumah hian kan tarlang ang a, theih angin kan lo thlirlawk dawn bawk a ni.
DNGA platform
Heng company pahnihte SUV tihchhuah tur, an enchhin mek tawh hian DNGA (Daihatsu New Global Architecture) modular platform a hmang dawn a. Hei hian underbody leh suspension duan thar a nei dawn a ni. He platform hi a tha khawp mai a, a lirthei a tihngheh dawn bakah hle a, chutihrual chuan he lirthei hi a zang tha viau dawn bawk a. Platform rit lutuk si lo, a lirthei siamphunga nghet church bawk si a rawn nei dawn a, hei hi thil thar tha leh changkang, tunlai tak bawk si a tih theih ang a, a lirthei quality pawh a tisang dawn e..
A lirthei landan
Maruti Suzuki leh Toyota mid-size SUV thar tur hi a landan han sawi hleihtheih pawh a ni rih lo a. Tuna an enchhin mek internet lama darh mek lah hi an la thup khawp mai a. Chutihrual chuan eng eng emaw chu lo sawi lawk theih a awm a. Chiang leh
kimchang lehzualin company lam atang te pawhin thuchhuak a awm vat turah te pawh ngai ila. Lang thei maiah chuan Toyota SUV ho, RAV4 leh Corolla Cross te nen a inang viau mai a. Toyota ho ta tur zawk hi chuan airdam lian tha tak, honeycomb mesh pattern nei tel te, double LED DRL awm tel split headlamp te a rawn neih beisei a ni bawk.
Maruti Suzuki lam lirthei tur Maruti YFG tia codename an pek thung hi chuan A-Cross atanga lak LED DRL, split headlamp setup te a rawn nei dawn a. Baleno thar bera grille design ang deuh te a nei bawk a ni. Hei bakah hian a ke bawrah alloy wheel mawi tak mai te, a hnunglam enna sideglass kan tih thin mai ORVM a turn indicator awm nghal te, ground clearance tha tak mai (200mm) te kan hmu ang..
Heng SUV pahnihte hi a chhunglam awmdan tur engmah sawilawk emaw hriatlawk theih a awm rih lo a. Hetihrual hian tunlaia lirtheia kan hmuh ang hmanraw changkang hrang hrang chu kan hmuh a beiseiawm a. Touchscreen infotainment system hlai tha tak, connected car technology leh thildang dang kan hmuh ngei a beiseiawm a ni.
A khawl
A khawl lamah chuan heng midsize SUV pahnihte hian Maruti Suzuki 1.5K15B naturally aspirated petrol khawl a hmang beisei a ni a. He khawl hian 104bhp power leh 138Nm torque te a pechhuak thei a ni. Thuthang awm mekah chuan heng SUV te pahnihin a hman tur khawlah bik hi chuan hybrid technology tha leh chak zawk a neih tel beisei a ni a, hei hi a hman chuan a khawl hi a chak zawk ang a, tui a heh lo viau zawk dawn bawk.
Tlangzarh hun
Maruti Suzuki leh Toyota atanga midsize SUV thar tur pahnih hi kum kumtawp lamah tlangzarh hman a nih beisei a ni a. Diwali lai emaw, Diwali hnaih takah an tlangzarh rin a ni bawk. Company pahnihte hi tlangzarh turin an inpeih tep tawh niin a lang a, thuchiang leh dik zawk, kimchang zawk kan hre thuai turah ngai ila. Company tha leh hlun pahnihte tangkawpin lirthei leitu leh ngainatute tan lirthei thar tha tak an rawn chhawpchhuak leh tur hi a lawmawm hle.