Congress-in an ngum khak an hmu lo, an hun laiin vawi 30 chuang treasury khar : MNF vice president

Aizawl: MNF Vice President Lalthlengliana’n nimin khan Hnam Rûnah thu sawin Congress party chu an ngum khak hmu lova MNF sorkar beiah a puh a, “An hunlai khan treasury vawi 30 chuang an khar,” a ti.

Lalthlengliana chuan Congress sorkarin kum 2012 atanga 2015 chhung khan RBI atangin Rs Vbc 1,331.61 lai an puk a, Chief Minister Pu Hawla’n a khât tawkin, ‘RBI-a kan sum dinhmunin a sen a kawk reng,’ a ti reng,” tih sawiin, tuna an president, Pu Lalsawta’n finance a chan laiin SSA sum Rs Vbc 70, sikul naupang uniform leina tur an ti-lapse tih leh Congress sorkar khan MNF sorkar thar chu leiba Rs. Vbc 7,300 chuang a hnutchhhiah tih a sawi.

MNF vice president chuan an sorkar laia sum an neih loh avangin Hindi teacher 1,300 chuang, Forest Dept. hnuaia mi 200 chuang, RMSA clerk 81 leh lab attendent 280 chuang an bântir a, industry deptt hnuaia mistiri bungraw sem an titawp tih sawiin, “Social welfare atanga NGO-te hnena tanpuina pek thin, dekchi leh no bakah rualbanlote hnena bengdar leh zak dawh tiang pek thin an titawp,” a ti.

Kum 10 ro an rel chhungin MLA pangaten an chhuahsan a, corruption kaihhnawih avangin an minister pahnih leh MYC chairman an bâng a, seal lem siam avangin an MLA pakhat chu central jail a lut tih sawiin, chief minister khan a mi malin helicopter hman manah mipui sum Rs nuai 57.12 zet a hmang ral tih a sawi.

MNF vice president chuan Chief Minister Zoramthanga tluka finance enkawl thiam Mizoramah an la awm lo tih sawiin, “Kum 1998 khan Congress sorkarin cheng vaibelchhe tam tak leiba a hnutchhiah chungin bul a tan a, Peace Bonus Rs Vbc 182.45 chu a dil chhuak a, MNF sorkar hmasa chhung khan treasury khar a awm ve lo a, hmasawnna kawng hrang hrang hnathawh a ni,” a ti.

Thlenga chuan tuna sorkarna an chan leh hnuah pawh Mizoram kawng chhe lutuk chu MNF sorkar tirhah siam that vek a ni a. District tam takah phullem phah a ni a, chief minister-in tun term tharah pawh Bamboo Link Road atan Rs. Vbc 100, Special Assistance Rs. Vbc 400, tun hnai maiah MoRTH atangin kawng thar tur leh a chhe siam nan Rs. Vbc 6,664 lai a sawi chhuak leh tawh tih a sawi bawk a ni.

Leave a Reply

Your email address will not be published. Required fields are marked *

error: Content is protected !!